Велика Британија по стапките на Данска - кралството воведува нови правила, сите азиланти ќе мора да зборуваат „течно“ англиски јазик
Новата реформа на британскиот систем за имиграција, подготвена од владата на Киер Стармер, ќе побара од мигрантите што доаѓаат да живеат и работат во Велика Британија значително повисоко ниво на познавање на англискиот јазик. Моментално е потребно само основно ниво, еквивалент на GCSE-испит, но наскоро ќе се бара ниво слично на A-level – кое подразбира течно зборување и способност за пишување на комплексни теми. Ова е дел од обидите да се подобри интеграцијата на мигрантите во британското општество.
Јазикот како главен услов
Дополнително, сите баратели на азил кои ќе добијат дозвола за останување, ќе мора да го исполнат овој повисок јазичен стандард пред да можат да побараат постојан престој. Новата бела книга што ќе се објави следната недела ќе предложи и построги проверки за познавање на англиски, како и мерки за промовирање на „британски вредности“ – како што се демократија, верска толеранција и почит кон законот. Во меѓувреме, владата планира да ја намали зависноста од странска работна сила. Секторите со недостиг од работници – како инженерството, технологијата и градежништвото – ќе мораат да зголемат број на обуки и вработување домашен кадар, или ќе го изгубат пристапот до странски работници.
Сместувањето на азилантите ја чини Велика Британија многу повеќе од предвиденото
Покрај тоа, податоците на Националната ревизорска канцеларија покажуваат дека сместувањето на апликантите за азил, главно во хотели, ќе ја чини државата 20 милијарди долари во следните 10 години – повеќе од тројно над првичната проценка од 6 милијарди. Компаниите кои имаат договори за сместување – Clearsprings Ready Homes, Mears Group и Serco – оперираат во различни региони во Обединетото Кралство, а извештајот покажува дека хотелското сместување може да биде попрофитабилно за нив отколку другите форми на домување. Ова отвора прашања за транспарентноста и ефикасноста на државната имиграциска потрошувачка. Сепак, успехот на мерките ќе зависи од тоа колку ефикасно ќе се спроведат на терен, како и од реакцијата на бизнисите, општеството и политичката опозиција.
