Санае Такаичи – металката што може да стане првата жена премиер на Јапонија
Повеќе од четири децении, Санае Такаичи не го напушта тапанот и хеви металот. Со истиот отпор и енергија ги води битките во едно од најпатријархалните општества на светот. Додека политичката сцена е потресена од скандали, Такаичи се бори да се запише во историјата како прва жена премиер на Јапонија. Но колку навистина е подготвена да го направи овој тежок подвиг?
In This Article:
- Од бенд до политичка сцена: Метал енергија која не згаснува
- Конзервативка, но револуционерка: Од скутер и кожни здолништа до јапонскиот политички врв
- Прва жена лидерка на ЛДП, но политичките битки штотуку почнуваат
- Тврда националистка која сака да воведе „патриотско образование“ и даночни олеснувања за родителите
Од бенд до политичка сцена: Метал енергија која не згаснува
Санае Такаичи уште од студенските денови го сака хеви металот и ужива во музиката на Блек Сабат и Ајрон Мејден. Таа свирела тапани во бенд, се трудела толку жестоко што секогаш носела четири пара палки, за ако ги скрши едните да има резерва. Денес, на 64 години, сѐ уште тропа, како антистрес терапија и тоа најчесто од животот со сопругот. „Свирам кога тој ќе заспие“, се шегува. Токму таа сила и пркос ја инспирираше низ нејзиниот нетипичен, но импресивен политички пат до врвот на Либерално-демократската партија (ЛДП).
Конзервативка, но револуционерка: Од скутер и кожни здолништа до јапонскиот политички врв
Такаичи не потекнува од политичко семејство: татко ѝ работел во авто-индустријата, мајка ѝ била полицајка. Била стажантка кај демократска конгресменка во САД и ТВ-коментаторка – енергична, со кратка коса и мотор Kawasaki Z400GP, драстично различна од машките колеги. Но во 1993 година, со влезот во парламентот, го напушта моторот за да избегне несреќи што би ѝ ја попречиле политичката кариера. Од тогаш досега, девет пати е реизбрана, била на неколку министерски позиции, од еднаковост до економска безбедност. Нејзината иконична „Санае“ фризура – кратка и остра – стана симбол на нејзината решителност.
Прва жена лидерка на ЛДП, но политичките битки штотуку почнуваат
На 4 октомври Такаичи стана првата жена што застана на чело на ЛДП – потег што речиси сигурно води до премиерска функција. Но веднаш се соочи со ладен туш: традиционалниот коалициски партнер Комејто одбива да учествува во влада предводена од неа, поради недоверба од скандали со црни фондови во ЛДП. Такаичи мора брзо да обезбеди нови сојузници за мнозинство и стабилност, а ја чека огромна листа предизвици: демографска криза, раст на цените, ослабен јен... Нејзините економски планови, наречени „Санаеномикс“, се контроверзни – предлага големи трошоци и ниска инфлација, но професорите предупредуваат дека тоа може да ја влоши ситуацијата со јавниот долг и да го направи животот уште потежок за граѓаните.
Тврда националистка која сака да воведе „патриотско образование“ и даночни олеснувања за родителите
Такаичи е позната како тврда националистка: член е на лобито Нипон Каиги, силно поддржува ревизија на пацифистичкиот устав и била критична кон Кина. Посетувала контроверзни храмови, ја нагласува потребата од „патриотско образование“ и јавно се изразила против олеснување на имиграцијата. Но аналитичарите предвидуваат дека како премиерка ќе треба да ги омекне реториката и потезите – веќе најави дека нема да го посети храмот Јасукуни за време на есенскиот фестивал. Паралелно, мора да ја врати довербата кај јавноста по серија скандали во ЛДП. Нејзините предлози за женските права се ограничени, но најави посебни даночни ослободувања и мерки за родителство. Дали Саннае Такаичи ќе ја реформира ЛДП – или ќе ја однесе уште подлабоко во конзервативизмот?
