Сега е јасно зошто жените паметат сè: Нивниот мозок старее побавно од машкиот, открива нова студија
Новите резултати од студијата сугерираат дека мозокот на жените е подобро прилагоден за стареење во споредба со машкиот. Според научниците од Универзитетот во Калифорнија, Сан Франциско (UCSF), жените типично „имаат мозок што изгледа помлад“ со текот на времето, а тие сега мислат дека знаат зошто.
In This Article:
Моќта на вториот X хромозом
Долго време се сметаше дека вториот X хромозом кај жените нема некоја значајна улога. Но, новата студија на UCSF откри дека овој „тивок“ хромозом може да се активира во подоцнежниот живот. Научниците испитувале лабораториски глувци, вклучувајќи 20-месечен генетски модифициран женски глушец – еквивалентен на 65-годишен човек. „Кај типично стареење, жените имаат мозок што изгледа помлад, со помалку когнитивни нарушувања во споредба со мажите“, објаснува професорката по неврологија Дена Дубал, водечки автор на студијата. „Овие резултати покажуваат дека тивкиот X хромозом кај жените повторно се активира подоцна во животот, веројатно помагајќи во забавување на когнитивниот пад. „Стареењето го пробуди заспаниот X.“
Гени кои го зајакнуваат мозокот
Истражувањето, објавено на 5 март, покажало дека активирањето на X хромозомот ослободува околу 20 гени поврзани со развојот на мозокот. „Веднаш помисливме дека ова може да објасни зошто женскиот мозок е поотпорен на стареење, бидејќи мажите го немаат овој дополнителен X“, вели Маргарет Гадек, докторска студентка и прва авторка на студијата.
Потенцијални нови терапии
Ова откритие отвора можности за идни истражувања за подобрување на когнитивните функции. „Когнитивниот пад е еден од најголемите медицински предизвици, но мозокот има потенцијал за промени и X хромозомот може да ни покаже што е можно“, вели Дубал. „Дали постојат начини да ги засилиме гените, како PLP1 од X хромозомот, за да го забавиме когнитивниот пад – и кај жените и кај мажите?“
Влијание врз здравјето
Ова откритие може да помогне во објаснување на разликите меѓу половите кај многу дегенеративни болести. „Истражувавме само еден дел од мозокот, но што е со остатокот од телото и со неактивниот X хромозом?“ прашува Дубал. „Каква улога има ова будење на X хромозомот во кардиоваскуларните болести, ракот и други состојби? Ова е јасен пример за тоа како разбирањето на специфичната женска биологија може да доведе до нови терапии – не само за женскиот, туку и за машкиот мозок. Нашето истражување сугерира дека сите би можеле да имаме корист од малку повеќе X.“
COMMENTS 