По 60 години решила да направи ДНК тест за да го најде биолошкиот татко и открила нешто толку морничаво што посакала никогаш да не го правела
Една жена од Северна Каролина, посвоена како бебе пред повеќе од шеесет години, доживеала студен туш кога обичен комерцијален ДНК тест ѝ ја открил вистината за нејзиното биолошко потекло. Наместо топла семејна приказна, Кети Гилкрист открила нешто толку морничаво и застрашувачко што на крајот признала дека можеби било многу подобро никогаш да не чепнела во минатото. „Колку повеќе слушам за него, толку станува пострашно. Веднаш штом го внесов неговото име на Гугл, првото нешто што ми се појави беше официјална потерница од ФБИ меѓу десетте најбарани бегалци на листата“, раскажува Кети за локалната телевизија WXII 12.
In This Article:
На формуларот означила дека е посвоена и чекала шест недели
Гилкрист била посвоена во 1950-тите години и со децении живеела мирен живот без информации за нејзините биолошки родители. Пред неколку години одлучила, од чиста љубопитност, да направи генетски тест преку платформата 23andMe. На формуларот означила дека е посвоена, надевајќи се дека можеби ќе стапи во контакт со некој далечен роднина. Кога резултатите пристигнале, преку базата на податоци ѝ се јавила нејзина братучетка од трето колено. Како што нивната комуникација напредувала, братучетката почнала да го истражува семејното стебло за да го пронајде точниот идентитет на биолошкиот татко на Кети. Но, кога конечно го склопила генетскиот мозаик, настапил шок.
„Јас на шега очекував некоја славна личност“
„Бев во тотален шок. Морам да признаам, не затоа што сум лоша личност, туку од чиста нервоза и неверица едноставно се изнасмеав. Јас на шега очекував некоја славна личност — си велев, можеби Роналд Реган ми бил татко, кој знае. Но, реалноста беше вистински хорор филм“, искрено раскажува Кети. Нејзиниот биолошки татко бил Вилијам Бредфорд Бишоп Џуниор — американски дипломат и поранешен висок службеник во Стејт Департментот, кој во 1976 година извршил едно од најкрвавите семејни злосторства во американската историја.
Бишоп во 1976 година исчезнал по убиството на пет членови од семејството
Според полициските досиеја, Бишоп во нивниот семеен дом во Бетезда, Мериленд, со чекан до смрт ги претепал својата 68-годишна мајка, својата 37-годишна сопруга Анет и тројцата малолетни синови на возраст од 5, 10 и 14 години. По масакрот, со автомобил ги превезол нивните тела во Северна Каролина, ги запалил во плиток гроб во шума, го напуштил возилото во национален парк и исчезнал без никаква трага. Федералното истражно биро, ФБИ, со децении неуморно трага по него. Во 2014 година Бишоп бил ставен на озлогласената листа на десетте најбарани бегалци во светот, со понудена награда од 100.000 долари за информација.
„Монструмот за кого зборуваше цела Америка всушност ми е роден татко“
„Си помислив: 'Леле, ова е апсолутно грозоморно'. Одеднаш сфатив дека многу добро се сеќавам на веста кога тоа се случило во 1976 година. Тогаш живеев во Мериленд, го слушавме тоа на вести, а јас немав поим дека монструмот за кого зборуваше цела Америка всушност ми е роден татко“, вели Гилкрист. Откако ја дознала шокантната вистина, љубопитноста ја совладала. Со години собирала новински исечоци, дневнички записи, официјални белешки и полициски потерници. За време на изолацијата во пандемијата, Кети одлучила целата своја неверојатна приказна да ја објави во книга насловена „It's In My Genes“ („Ми лежи во гените“). „Знаете, ова не е никаква игра. Науката и генетиката се реални. И штом еднаш ќе дознаете информација што е непобитна вистина, повеќе никогаш не можете да ја вратите назад или да се преправате дека не постои“, предупредува таа за сите оние што непромислено чепкаат по своето минато.
Ако е жив, денес би имал околу 90 години
По објавувањето на книгата, приказната стана планетарно вирална, а Кети воспоставила и блиска комуникација со специјалните агенти на ФБИ кои сè уште работат на овој замрзнат случај. Доколку Бишоп е сè уште жив, Кети истакнува дека има безброј прашања што би сакала да му ги постави доколку некогаш се сретнат лице в лице. „Би го прашала дали воопшто знаел дека некаде има ќерка и какво чувство му предизвикувало тоа низ годините. Ако сè уште дише, би го прашала што мисли за сè она што излезе на виделина за него. Но, најверојатно само би го погледнала и би му рекла: 'Зошто направи такво нешто?'“, раскажува таа. Сепак, дури и половина век по крвавиот настан, убиствата остануваат отворена енигма. Низ децениите имало наводни пријави дека Бишоп бил виден на различни локации, особено низ Европа, каде што порано работел и течно зборувал повеќе јазици, но ниту една трага никогаш не довела до негово апсење. „ФБИ никогаш не го пронајде Бишоп. Случајот сè уште се води како активен и не е затворен“, заклучува Кети, чиј живот засекогаш остана обележан од мрачната тајна што случајно ја откопа со обична ДНК анализа.