Весна Јаневска: „Ќе затвориме 20 подрачни училишта. Пет деца во пет различни одделенија не е ниту образование, ниту социјализација“
Министерката за образование и наука Весна Јаневска најави нов чекор во оптимизацијата на образовната мрежа во земјава. Годинава, според нејзината најава, ќе бидат затворени околу 20 подрачни училишта, таму каде што бројот на ученици е толку мал што наставата повеќе не може да го понуди она што училиштето треба да го даде: учење, средба со врсници и секојдневна социјализација.
Во некои паралелки има само еден ученик
Јаневска објасни дека со процесот ќе бидат опфатени училишта со многу мал број ученици, најчесто оние со помалку од пет, но и некои со седум или осум ученици. Според неа, наставата во такви услови не овозможува доволно квалитетен образовен процес. „Пет деца во пет различни одделенија, тоа не е образование ниту социјализација“, рече Јаневска, додавајќи дека учениците треба да имаат можност да учат и да се дружат во поголеми групи.
И во 2021 и 2022 година бил применет истиот рез поради недостиг на ученици
Министерката посочи дека и во тие две години околу 20 подрачни училишта биле затворени од истата причина. Таа оцени дека намалувањето на бројот на ученици главно е последица на падот на наталитетот, додека иселувањето, според неа, не е единствената причина. Јаневска најави и дека учениците новата учебна година ќе ја започнат со обезбедени учебници, при што најголем дел од дистрибуцијата веќе е завршен.
