Ново истражување открива 6 шокантни последици од спиење помалку од 7 часа
Често сме советувани да спиеме најмалку седум часа секоја ноќ. Но, стресот, несоницата или надворешни фактори често го оневозможуваат ова. Неодамна, компанијата за технологија на спиење Simba искористи вештачка интелигенција за да ги анализира физичките последици од недоволниот сон. Експертите предупредуваат дека недостатокот на сон може значително да влијае врз телото.
In This Article:
Хормонални промени
Simba анкетирала 2.175 возрасни лица во Велика Британија за нивните навики на спиење, физичкото здравје и изгледот. Податоците биле обработени со АИ-базирана анализа, која визуелно прикажала како се менува телото во зависност од тоа дали спиете повеќе или помалку од седум часа. „Недостатокот на сон не ве остава само уморни – тој се одразува на целото тело“, објаснува Лиса Артис, заменик-директор на The Sleep Charity, партнер на Simba. „Кога не спиете доволно, нивото на кортизол – хормонот на стрес – се зголемува, што ги влошува воспалителните состојби на кожата, како егзема и псоријаза, предизвикувајќи иритација, црвенило и чешање“, додава таа.
Зголемување на телесната тежина
Недостатокот на сон е поврзан со дебелеење. Истражувањето покажало дека 26% од оние што не спиеле доволно имале прекумерна тежина, а 32% пријавиле надуеност. „Во текот на сонот, телото ги балансира хормоните грелин и лептин, кои го регулираат гладот и ситоста“, објаснува Артис. Кога не спиете доволно, нивото на грелин се зголемува (предизвикувајќи поголем апетит), додека лептинот опаѓа (па потешко се чувствувате сити). Оваа хормонална нерамнотежа доведува до прејадување, особено со храна богата со шеќер и калории. Дополнително, недостатокот на сон различно влијае на мажите и жените во однос на распределбата на мастите. „Жените почесто добиваат сало околу колковите и бутовите поради хормонални промени, додека кај мажите мастите повеќе се таложат околу стомакот поради намаленото ниво на тестостерон“, вели Артис.
Различни проблеми со кожата
Кожата е еден од првите органи што покажува знаци на недоволен сон. „Ако не спиете доволно, намалениот проток на крв ја прави кожата побледа и без сјај, одземајќи и ја природната свежина и еластичност“, објаснува Артис. Според истражувањето, 24% од испитаниците со недоволен сон пријавиле зголемена чувствителност на кожата. Најчестите кожни проблеми биле: Егзема (16%) Псоријаза (7%) Безживотен тен (10%) „Во текот на ноќта, кожата интензивно се регенерира. Доволниот сон ја подобрува циркулацијата, помагајќи во природните процеси на обновување и одржувајќи ја кожата здрава и блескава“, додава таа.
Слаби и кршливи нокти
Околу 15% од испитаниците кои не спиеле доволно забележале дека нивните нокти станале покршливи. Ова може да биде резултат на нарушените процеси на регенерација во телото, кои се клучни за здравјето и цврстината на ноктите.
Нарушување на регулирањето на телесната температура
Друга неочекувана последица на недоволниот сон е чувството на студени раце и нозе. „Температурата на телото е под контрола на циркадниот ритам... Недостатокот на сон може да ја наруши способноста на телото да ја регулира температурата, предизвикувајќи непријатност и промени во екстремитетите“, објаснува Артис.
Проблеми со варењето
Посебно истражување ги анализирало врските помеѓу проблемите со варење и недостатокот на сон. Резултатите покажале дека луѓето со нарушен сон имаат значително поголем ризик од запек, што укажува на важноста на квалитетниот сон за здравјето на дигестивниот систем.
Колку сон ни е потребен?
Оптималното времетраење на сонот зависи од различни фактори. „Здравиот возрасен човек обично има потреба од 7 до 9 часа сон“, советува британскиот NHS. Сепак, потребите за сон варираат во зависност од возраста, здравствената состојба и животниот стил. Некои луѓе природно имаат потреба од повеќе сон. Бебињата, децата и тинејџерите, на пример, имаат зголемени потреби за одмор заради раст и развој, а новороденчињата можат да спијат меѓу 8 и 16 часа дневно.
COMMENTS 
