Како е пронајден недопрениот гроб на Филип II и златното сонце што преживеа илјадници години и стана симбол на Македонија и Македонците ширум светот
Есента 1977 година, археологот Манолис Андроникос стоеше на врвот на ридот Големиот Тумбос кај селото Кутлеш во Егејска Македонија. Под себе ја гледаше долината во која некогаш започнуваше историјата на македонското царство. Мештаните го познаваа овој голем земјен рид со неколку древни гробници, кои беа ограбени уште многу одамна. Но Андроникос беше убеден: тука длабоко има нешто многу поголемо од неколку обични гробници. Со години ги споредуваше наодите, легендите и старите извори – сè укажуваше дека овде некогаш била Ајга, старата македонска престолнина, последното прибежиште на нејзините кралеви.
In This Article:
- Триумфот на истражувањето: археолозите откриваат скриена камена врата покриена со сина боја
- Две простории исполнети со злато, оружје и ретка фреска од лов на лав – докази за кралска моќ
- Во втората просторија – жена опкружена со сребро и скапоцености, доказ за владејачки статус
- Научните докази: повреденото око на скелетот ја потврдува сензацијата – тоа е Филип II
- Откритието го потврди античниот статус на Кутлеш како престолнина на Македонија и го прослави археологот што ја разоткри вистината
- Денеска ризницата на Филип II останува вечен симбол на Македонија
Триумфот на истражувањето: археолозите откриваат скриена камена врата покриена со сина боја
Раскопувањето започна во октомври. Тимот се движеше полека, слој по слој, и на 8 ноември ја пронајде скриената камена ѕидина. Позади неа се откри премин до масивна камена врата со остатоци од сина боја. Кога археолозите внимателно ја отворија, во слабата светлина на ламбите заблеска злато. Гробницата беше недопрена.
Две простории исполнети со злато, оружје и ретка фреска од лов на лав – докази за кралска моќ
Внатре имаше две простории. Во првата, остатоците од човек беа положени во златен ковчег украсен со сјајно сонце со шеснаесет зраци. На капакот - венец од дабови листови од најчисто злато. До нив – мечеви, оклопи, штит со грифон и богатство предмети од дворскиот живот. Ѕидовите - украсени со исклучителна фреска: лов на лав, сцена полна со движење и сила.
Во втората просторија – жена опкружена со сребро и скапоцености, доказ за владејачки статус
Втората просторија чувала остатоци од млада жена, веројатно сопруга. Околу неа имало накит, сребрени садови, ѓердани со скапоцени камења. Сѐ укажувало на кралскиот статус на погребаните.
Научните докази: повреденото око на скелетот ја потврдува сензацијата – тоа е Филип II
Кога Андроникос ја здогледа златната кутија и венецот, веднаш сфати: ова е гроб од крал, не од обичен благородник. А името што го кажа беше Филип Втори – таткото на Александар Македонски. Неговото сомневање го потврдија антрополошките анализи: на черепот имаше очигледни траги од тешка повреда на окото, онаа која е позната од историските извори.
Откритието го потврди античниот статус на Кутлеш како престолнина на Македонија и го прослави археологот што ја разоткри вистината
Откритието на Андроникос беше сензација. Докажа дека Кутлеш е античкиот град Ајга – првата престолнина на Македонија, а гробницата е на кралот кој го смени текот на историјата. Археологот кој го посвети животот на истражување на македонските владетели, конечно ги најде и остави свој печат во светотот на археологијата.
Денеска ризницата на Филип II останува вечен симбол на Македонија
Денес гробот на Филип II и богатството најдено во него се наоѓаат во музеј изграден директно над ископините. Посетителите можат да прошетаат по истите ходници по кои некогаш одел македонскиот крал и во полумракот да ја здогледаат златната ѕвезда од Кутлеш – симбол што преживеал илјади години и станал симбол на Македонија и Македонците.
