Меги преживеала најсурово малтретирање: Пронајдена со 17 прострелни рани, слепа и без уво - нејзината судбина го расплака светот
Беше на самиот раб на смртта, слепа, со скршена вилица и со минимални шанси за преживување. Само една година подоцна, Меги стана сертифицирано терапевтско куче кое носи насмевки и утеха на оние на кои тоа им е најпотребно. Нејзината приказна делува како сценарио за потресен филм, но ова е вистинска животна драма за страдањето на едно невино суштество, за малтретирањето на животните, но и за нескршливата волја за живот и неверојатната моќ на простувањето.
In This Article:
- Во Либан ја нашле заврзана за кутија, во критична состојба
- „Wild at Heart Foundation“ пристигна кога случајот ја крена светската јавност на нозе
- Кејси Карлин од Брајтон сакала само привремено да ја прифати
- Слепилото не ја спречи да им приоѓа на луѓето со мавтање на опашката
- Во 2019 година Меги беше регистрирана како терапевтско куче
- Во училиштата, нејзината приказна стана лекција против насилство
- Од локва крв до „Wonder Dog Rescue“
Во Либан ја нашле заврзана за кутија, во критична состојба
Неволјите на Меги започнале во Либан, каде што го преживеала еден од најсуровите забележани случаи на насилство врз животни. Била пронајдена целосно напуштена и во исклучително тешка состојба. Во нејзиното тело биле изброени дури 17 прострелни рани од огнено оружје, поради што целосно го загубила видот. Насилниците дополнително и го отсекле едното уво и и ја скршиле вилицата. Во моментот на страотниот напад таа била бремена и, за жал, ги загубила сите свои кученца.
„Wild at Heart Foundation“ пристигна кога случајот ја крена светската јавност на нозе
Веста за овој страотен случај со молскавична брзина се прошири на социјалните мрежи. Британската хуманитарна организација „Wild at Heart Foundation“ веднаш пристигна на помош, ја презеде целосната грижа за Меги и овозможи серија сложени хируршки операции и неопходно лекување за таа да ги преживее тешките повреди.
Кејси Карлин од Брајтон сакала само привремено да ја прифати
По долготрајниот и макотрпен опоравок, Меги во 2018 година го напуштила Либан и отпатувала за Велика Британија. Таму ја пречекала Кејси Карлин од Брајтон, девојка која за нејзината тажна судбина дознала преку интернет. Кејси првично планирала само привремено да ја прифати во својот дом додека не се најде трајно решение. Но, по еден месец заеднички живот сфатила дека едноставно не може и не сака да се раздели од неа, па и официјално ја посвоила.
Слепилото не ја спречи да им приоѓа на луѓето со мавтање на опашката
На почетокот и била потребна помош при снаоѓањето во просторот, но загубата на видот не ја спречила Меги да си игра, да се дружи со други кучиња и радосно да им приоѓа на луѓето. Наспроти се што преживеала и сето зло што и го нанеле луѓето, таа покажала несекојдневна благост, љубов и неограничена доверба.
Во 2019 година Меги беше регистрирана како терапевтско куче
Само една година по пристигнувањето во новото семејство, Меги беше официјално регистрирана како терапевтско куче, благодарение на својата смирена природа и неизмерна љубов кон луѓето. Тогаш започна нејзината посебна животна мисија. Таа редовно посетува болници, домови за стари лица и универзитети, каде што со своето мирно присуство им пружа утеха и емоционална поддршка на лицата што минуваат низ најтешките животни искушенија.
Во училиштата, нејзината приказна стана лекција против насилство
Меги стана и чест гостин во основните и средните училишта, каде што учествува во едукативни работилници. Таму децата учат почит кон животните, прифаќање на различностите и решително спротивставување на врсничкото насилство. Нејзината инспиративна приказна поттикнува и масовно вдомување на кучиња со попреченост, докажувајќи дека и животните со инвалидитет можат да живеат исполнет, среќен и корисен живот.
Од локва крв до „Wonder Dog Rescue“
Инспирирана од животната судбина на Меги, сопственичката Кејси го покрена и хуманитарниот проект „Wonder Dog Rescue“, целосно посветен на спасување животни со посебни потреби. Така, Меги, која некогаш самата чекала спас врзана во локва крв, стана глобален симбол на надеж и цврст потпирач за оние на кои помошта им е најпотребна.