Македонија со нова генерација зависни од коцкање: 71% од младите во Македонија веќе се коцкале, 17,8% се зависни комарџии! Кој ќе преземе нешто?
In This Article:
- ХОПС со препораки
- Загрижувачки податоци!
- Голем број млади редовно играат игри на среќа
- Некој играат за забава, а некој за адреналинот
- Организаторите на игри на среќа треба да ги информираат играчите за ризиците
- Центри за лекување зависности
- Србија е единствената каде организаторите се должни да ги информираат граѓаните за ризиците
- Законската регулатива не се спроведува доследно
ХОПС со препораки
На настанот беа презентирани резултатите од истражувањето „Младите и нивните навики за обложување во Македонија, Србија и Косово“, како и препораки за превенција и лекување на зависност од игри на среќа кај младите. Препораките вклучуваат информирање за ризиците од игрите на среќа, воведување програми за превенција, како и отворање центри за лекување на зависности.
Загрижувачки податоци!
Загрижувачки податоци покажуваат дека значителен дел од младите во Република Македонија веќе развиле зависност од игри на среќа, беше истакнато на вчерашната прес-конференција организирана од здружението ХОПС – Опции за здрав живот – Скопје. На настанот беа презентирани резултатите од истражувањето „Младите и нивните навики за обложување во Македонија, Србија и Косово“, како и препораки за превенција и лекување на зависност од игри на среќа кај младите.
Голем број млади редовно играат игри на среќа
„Јасно е дека голем број млади во Македонија редовно играат игри на среќа. Од 214 учесници во онлајн истражувањето, дури 71% потврдиле дека играле игри на среќа, а 17,8% изјавиле дека се зависни. Дополнително, половина од учесниците во фокус групите признаваат дека играат секојдневно,“ беше истакнато на настанот.
Некој играат за забава, а некој за адреналинот
Главниот истражувач, Влатко Деков од ХОПС, објасни дека 44,4% од учесниците рекле дека играат од забава, додека 24,8% го прават тоа заради финансиски добивки. Значителен процент (16%) признале дека играат затоа што и нивните пријатели се обложуваат, а 12% одговориле дека ги привлекува адреналинот што го чувствуваат при играњето.
Организаторите на игри на среќа треба да ги информираат играчите за ризиците
Меѓу предлозите се обврска на организаторите на игри на среќа да ги информираат играчите за ризиците од зависност и можностите за помош. Дополнително, се предлага воведување данок за финансирање програми за превенција и лекување на зависности, едукација на вработените за препознавање на знаците на зависност кај играчите, како и национална кампања за информирање младите за штетните последици од игрите на среќа.
Центри за лекување зависности
Се препорачува Министерството за здравство да отвори центри за лекување зависности, а Министерството за образование да воведе наставни програми за превенција на зависности во основните и средните училишта. Покрај тоа, предложено е воведување построги санкции за прекршувања на законот, особено за учество на малолетници во игри на среќа и послужување алкохол на малолетници. Како уште една мерка, се предлага целосна забрана на рекламирањето на обложувањето во медиумите, слично како забраната за рекламирање на цигари.
Србија е единствената каде организаторите се должни да ги информираат граѓаните за ризиците
Истражувањето е дел од регионалниот проект „Младите и коцкањето“, спроведен од ХОПС – Опции за здрав живот во партнерство со организации од Србија и Косово, и поддржан од Western Balkans Fund. Иако во сите три земји постои законска забрана за малолетници да учествуваат во игри на среќа, Србија е единствената каде организаторите се должни да ги информираат граѓаните за ризиците од коцкање и да им дадат информации за достапните опции за лекување. Во Македонија и Косово ваквите законски обврски недостасуваат.
Законската регулатива не се спроведува доследно
Дополнително, истражувањето покажало дека законската регулатива во регионот не се спроведува доследно, а испитаниците честопати сведочат како и малолетници учествуваат во игри на среќа, беше истакнато на настанот.
COMMENTS 