Клековски е 21-виот министер кој вети нова болница во Кичево
Кичево повторно доби најава за изградба на новата општа болница. Актуелниот министер за здравство Сашо Клековски го посети незавршениот објект, чија изградба започна уште во 80-тите години на минатиот век. Четири децении подоцна, оваа болница и натаму стои како едно од најдолгите здравствени ветувања за кичевци.
Бетонскиот скелет од 80-тите сега се проверува пред да се одлучи дали ќе се продолжи или ќе се бара нова локација
При работната посета на Општата болница во Кичево, министерот за здравство Сашо Клековски посочи дека изградбата на новата болница останува долгорочен проект на кој активно се работи. Тој нагласи дека граѓаните не можат да чекаат со години додека објектот целосно не се финализира. Клековски појасни дека во моментот се спроведуваат детални стручни студии за да се утврди дали постојната конструкција може градежно да се искористи и продолжи, или пак ќе биде поекономично и посигурно да се избере сосема нова локација.
За кичевци да не патуваат до Битола, Охрид и Скопје, сегашната болница треба веднаш да се зајакне
Новата болница во Кичево започна да се гради уште пред четири децении, а низ изминатите години дури 20 претходни министри за здравство даваа ветувања за нејзино завршување. За да им се овозможи квалитетна здравствена заштита на кичевци веднаш, Министерството за здравство презеде итни чекори за техничко и кадровско опремување на постојната болница. Со овие вложувања се очекува значително да се намали упатувањето на пациентите од Кичево кон клиниките во Битола, Охрид и Скопје, овозможувајќи навремена дијагностика и лекување во нивниот роден град.
