Испробајте ги најосвежителните летни пијалаци: Четири рецепти што вистински спасуваат од жешкото македонско лето
Секое лето сме желни за нешто свежо и вкусно што ќе ни ја изгасне жедта и ќе ни подари момент на ладење. Дали се сеќавате на времињата од детството кога мајка ви по вжештен ден ви нудеше чаша ледена лимонада или сок? Денес ви ги откриваме најдобрите испробани рецепти за летни пијалаци што никогаш не излегуваат од мода и воедно се полни витамини – за вас и семејството.
In This Article:
Класична лимонада со мед и нане – вашиот најдобар сојузник против жешкото
Ниту едно македонско лето не поминува без чаша домашна лимонада, но ако сакате покорисна варијанта, заменете го шеќерот со мед. Лимоните се цедат, а медот се раствора во вода (таа нека е студена, но не ледена!): така се задржуваат сите добри својства на медот. Додајте нане за уште повеќе свежина. Сервирајте ја оваа лимонада со мраз и парчиња лимон и уживајте во природниот вкус што ќе ве врати во детството.
Краставица за длабока хидратација – брзо и лесно
Краставиците не се само за салата! Во летните жештини, тие се идеална состојка за освежителен пијалак што навистина ја гаси жедта и му ја враќа влагата на телото. За подготовка на овој едноставен напиток, доволни се две свежи краставици – добро измиени и исечкани, кои потоа се блендираат додека не се добие мазно пире. Се додава сок од една лимета и околу литар ладна вода, а по вкус може да се додаде и малку мед или шеќер за блага нота. Сè се меша убаво во блендер и се сервира во чаши со мраз и неколку тенки парчиња лимета за дополнителна свежина. Овој природен пијалак има лесен, но богат вкус што пријатно освежува, го поддржува хидратацискиот баланс и нуди момент на ладење – токму кога најмногу ни е потребно.
Освежителен сок од јагоди – вкусно и корисно за кожата
Што може да биде подобро од свеж сок од јагоди во летните жештини? Особено ако јагодите се свежо набрани од градината – сочни, слатки и со мирис што веднаш потсетува на лето. Овој пијалок не е само вистинско освежување, туку и корисен за кожата, благодарение на богатството од витамин Ц и антиоксиданси што ги содржат јагодите. За подготовка, потребни се околу 300 грама свежи јагоди – измиени и исчистени од стебленцата – кои се ставаат во блендер и се омекнуваат до мазна смеса. Се додава сок од еден лимон, половина литар ладна вода и по желба малку мед или шеќер за поблага верзија. Смесата се блендира кратко додека не стане хомогена и се послужува со мраз за дополнителна свежина. Едноставен, природен и вкусен – овој сок од јагоди ќе ве освежи и ќе ве нахрани одвнатре, буквално.
Компот од рибизла со нане – витаминска експлозија за секое семејство
Летните компоти се повеќе од начин да ја згаснете жедта – тие се и вистинска витаминска инфузија. Особено кога се подготвени со сезонски бобинки како рибизлата. Без разлика дали е црвена или црна, рибизлата изобилува со витамин Ц и има пријатна киселкаста свежина што совршено одговара на топлите денови. За еден едноставен, но вкусен компот, доволно е да сварите околу 200 грама свежи рибизли со 1,5 литри вода. Штом водата зоврие, се додаваат неколку лажици шеќер (по вкус) и неколку листови свежо нане – за арома и лесна прохлада. Се вари на тивок оган околу 10 минути, па се трга на страна да отстои и добро да се излади. Се служи ладно, а ако сакате уште повеќе свежина, додадете и неколку коцки мраз. Освежува, храни и ве полни со енергија – со ваков компот, летото добива поинаков вкус.
