Финец изгради јахта за која не му треба гориво и отплови 5.700 километри за да докаже дека навистина функционира
Финскиот инженер и авантурист Лукас Сјоман решил да провери колку далеку може да се стигне по вода без бензин или дизел. Резултатот е „Helios 11“ – необична јахта долга 11 метри, која самиот ја изградил и со неа отпловил од Финска до шпанскиот остров Ибица, потпирајќи се на сончевата енергија. За изградбата на јахтата му биле потребни околу 200 работни дена. Наместо скапи и егзотични материјали, трупот го направил главно од морска иверица и фиберглас, а на покривот поставил соларни панели. „Helios 11“ е долг околу 11 метри и тежи приближно 1,5 тони. Соларниот систем може да произведува околу 6 kW електрична енергија, која се складира во батерии од 48 волти и потоа го напојува електричниот погон на бродот. Внатре има и основни услови за живот – кујна, фрижидер и тоалет.
Од Финска до Ибица без полнење гориво
Вистинскиот тест дошол кога Сјоман тргнал на патување низ Европа. Рутата го водела од Финска, преку Шведска, Данска, Германија и Франција, а потоа кон Медитеранот и Ибица. Вкупно поминал околу 5.700 километри, односно повеќе од 3.000 наутички милји, без да користи конвенционално гориво. Патувањето било уште поголем предизвик бидејќи започнало во текот на зимата, кога во северниот дел на Европа има значително помалку сончева светлина. Во деновите кога сонцето не било доволно, Сјоман ја намалувал брзината за да ја зачува енергијата, а бродот располага и со мала помошна едрилица. Во добри временски услови, според податоците што ги објавил Сјоман, „Helios 11“ може да помине и до околу 270 километри во еден ден. Патувањето не поминало без проблеми. Во Шпанија му бил украден помошниот чамец, а во близина на Кабо де Гата необичниот изглед на „Helios 11“ дури го привлекол вниманието на властите, кои го пресретнале бродот пред да утврдат за што станува збор. Сепак, Сјоман успеал да стигне до својата цел и практично да покаже дека мал брод може да мине илјадници километри без класично фосилно гориво. Неговиот експеримент не завршува тука – по успехот на „Helios 11“, Финецот веќе планира поголема соларна јахта за нови, уште поамбициозни патувања.
