Еден гигантски екосистем што врие од живот се крие под површината на Земјата
Под нашите нозе, во длабочините на планетата, постои невероатно обемен екосистем кој буквално врие од живот. Голем мегународен тим од научници откри дека милијарди и милијарди микроорганизми живеат километри под површината на Земјата. Претставувајки ги резултатите на годишниот состанок на Американскиот геофизички сојуз, истражувачите за првпат ја пресметаа големината на оваа мистериозна ризница на живиот свет. Заклучокот бил изненадувачки: таа е многу поголема отколку што некој претходно очекувал.
In This Article:
70 отсто од микробите на планетата не се околу нас, туку под нас
Научниците соопштија дека приближно толкав дел од вкупниот број микроби на Земјата живее под земја. Гледано како целина, овие микроорганизми претставуваат маса од околу 15 до 23 милијарди тони јаглерод, односно стотици пати повеке од вкупната јаглеродна маса на сите луге што живеат на површината. Истражувачите сè уште не успеале целосно да ги опишат овие суштества. Сепак, првичните податоци покажуваат дека генетската разновидност на животот под површината може да биде споредлива со онаа над неа, па дури и да ја надминува. Токму затоа оваа длабока подземна средина беше наречена „подземен Галапагос“.
Во јужноафрикански рудник за злато бил пронајден нематод на повеќе од 1,4 километри длабочина
Сепак, таму долу не очекувајте да сретнете џиновски желки. Бактериите и нивните еволутивни роднини, археите, доминираат под површината, иако истражувачите забележуваат дека можат да се најдат и сложени еукариотски организми. На пример, научниците опишаа претходно неидентификуван нематод пронајден во таква средина во јужноафрикански рудник за злато. „Пред десет години земавме примероци само од неколку локации - места каде што вообичаено очекувавме да најдеме живот“, изјави Карен Лојд, авторка на истражувањето и вонредна професорка по микробиологија на Универзитетот во Тенеси. „Сега, благодарение на примероците земени од огромни длабочини, знаеме дека можеме да најдеме живи организми речиси насекаде, иако досегашното земање примероци опфати само исклучително мал дел од длабоката биосфера.“
Дупнатини од 2,5 до 5 километри открија биосфера речиси двојно поголема од сите океани заедно
За да дојде до овие заклучоци, истражувачкиот тим обедини десетици научни студии кои анализираа примероци извадени од земјината кора, и од морското дно и од внатрешноста на континентите. На нивно големо изненадување, подповршинската длабока биосфера се покажала како речиси двојно поголема по волумен од вкупниот волумен на сите океани на Земјата заедно. Тоа е свет каде што температурите се екстремно високи, притисокот е смачкувачки, светлина воопшто нема, а хранливите материи се сведени на минимум. На прв поглед, никој не би очекувал да пронајде такво изобилство на живот на такво место. Сепак, научниците истакнуваат дека токму овој екосистем може да понуди одговори на клучните прашања за границите на животот на Земјата, но и надвор од неа, на другите планети. Иако овие истражувања драстично го збогатија нашето знаење за подземниот свет, останува уште многу да се научи. Научниците сè уште не ги знаат сите начини на кои животот во длабоките слоеви влијае врз животот на површината и обратно. Засега останува само восхитот кон невероатните метаболички процеси што им овозможуваат на овие организми да преживеат со милиони години во најекстремните услови на планетата.