Денес, 20 јули, е денот на Светата великомаченичка Недела. Која била Света Недела и зошто целиот православен свет ја слави?
Денешниот ден во православниот календар е посветен на Светата великомаченичка Недела, светителка чиј живот започнал како долго измолено дете, а завршил како сведоштво на верата пред цареви, судии, оган, ѕверови и меч. Нејзиниот спомен се чува како приказна за девојка која одбила да го замени Христос со земна чест, брак или спас на сопствениот живот.
In This Article:
Доротеј и Евсевија ја измолиле единствената ќерка во времето на Диоклецијан и Максимијан
Во времето на христоборните цареви Диоклецијан и Максимијан, во Анадолија живееле две побожни стари души, Доротеј и Евсевија. Биле побожни христијани, богати, но бездетни. Со непрестајна молитва испросиле од Бога едно чедо, оваа света Недела. Таа од детството Му се посветила себеси на Бога, воздржувајќи се од сè што прават разузданите деца. Кога пораснала, прекрасна во телото и во душата, навалиле многубројни просци. Но таа сите ги одбивала, велејќи дека е вереница на Господ Христос и дека ништо не сака, освен да умре како девојка.
Еден од одбиените просци ги предал како христијани пред царот
Еден од одбиените ги обвинил Недела и нејзините родители како христијани пред царот Диоклецијан. Царот наредил нејзините родители прво да бидат мачени, а потоа ги протерале во градот Мелитина, каде што нивниот крај бил во маки за Христа. Света Недела, пак, Диоклецијан му ја испратил на Максимијан да ја суди. Бидејќи ја потврдила својата вера во Христа пред Максимијан, тој наредил да ја тепаат со воловски жили. Потоа царот им ја предал на војводите, прво на Иларион, а откако тој умрел, на Аполониј. Тие ја мачеле ѕверски на сите можни начини, но сè им било залудно.
„Недело, не плаши се од маките, Мојата благодат е со тебе“
Додека света Недела лежела во рани во затворот, ѝ се јавил Господ Христос, ја исцелил и ѝ рекол: „Недело, не плаши се од маките, Мојата благодат е со тебе“. Христовата благодат навистина ја спасила оваа маченичка и од оган и од ѕверови, со што нејзините судии мислеле дека сигурно ќе ја умртват. Многумина незнабошци, гледајќи го нејзиното чудесно спасение од толку смрти, поверувале во Христа. Но сите биле заклани. Света Недела му рекла на Аполониј: „На ниеден начин нема да ме одвратиш од мојата вера. Ако ме фрлиш во оган, ги имам Тројцата младенци; ако ме фрлиш на ѕверовите, го имам за пример Даниил; ако ме фрлиш во морето, пример ми е пророкот Јона; ако ме предадеш на меч, ќе се сетам на Чесниот Претеча. За мене живот е да умрам за Христа.“ Тогаш Аполониј наредил да ја убијат со меч. Недела клекнала на колена, ги подигнала рацете кон небото и Му се помолила на Бога да ја помилува и да ги спаси сите што ќе го слават нејзиниот спомен, а нејзината душа да ја упокои заедно со душите на нејзините родители. Кога ја завршила молитвата, Му ја предала душата на Бога, пред мечот да се спушти врз нејзината света глава. Чесно пострадала и се преселила во Небесното Царство во 289 година, во Никомидија.
