Нешто чудно и масивно демне зад Нептун, а научниците не знаат што е тоа
Астрономите забележаа необичен и масивен објект далеку зад орбитата на Нептун, кој се движи во спротивна, ретроградна насока од речиси сите други небесни тела во нашиот систем. Откритието отвори серија прашања во научната заедница: од каде навистина потекнува ова мистериозно тело и зошто неговата орбита толку силно отстапува од она што астрономите го очекуваат во нашето космичко соседство.
R631 е широко околу 100 километри и го сече системот под агол од 142 степени
Според податоците од научната платформа EarthSky и реномираната опсерваторија „Вера К. Рубин“, овој необичен вселенски патник ја носи привремената научна ознака R631. Додека Земјата и речиси сите останати планети и тела во Сончевиот систем орбитираат околу Сонцето во релативно рамна рамнина, налик на палачинка, ова тело минува низ таа космичка поставеност под исклучително стрмен агол и се движи спротивно од природниот тек на поголемиот дел од околните објекти. Таквото движење не се вклопува во начинот на кој се смета дека се формирал Сончевиот систем пред неколку милијарди години. Во раната фаза, огромен облак од гас и прашина се сплескал и почнал да се врти како грамофонска плоча. Се што настанало од тој исконски диск продолжило да ротира во истата насока, и така останало до денес. Но R631 се движи обратно, како да ги заобиколува правилата што ги следат речиси сите други тела во нашето соседство.
Едно целосно коло околу Сонцето му трае речиси 548 години
Оваа аномалија во моментов се наоѓа на оддалеченост од околу 4,8 милијарди километри од Сонцето. Поради неговата необична патека, астрономите претпоставуваат дека можеби станува збор за масивна комета, потенцијално пристигната од простор надвор од нашиот Сончев систем. Ако таа процена се покаже точна, телото би можело масовно да испушта гасови и прашина кога ќе го достигне своето најблиско растојание до Сонцето во 2047 година. Теоријата дека потекнува надвор од нашиот систем засега е само една од можните хипотези: објектот можеби бил исфрлен од соседен ѕвезден систем, а потоа гравитацијата на нашето Сонце успеала да го зароби. Втората, подеднакво веројатна можност е дека се формирал токму тука, но бил исфрлен во превртена ретроградна орбита по сложена гравитациска игра на „флипер“ со гигантските планети Нептун или Јупитер. Истражувачите најавуваат дека внимателно ќе продолжат да го следат движењето на R631. Сепак, ќе биде потребно значително време пред науката да добие конечни и детални одговори за неговиот точен состав и вистинско потекло.
