Вкусот на есента: Како да го подготвите највкусниот чизкејк со тиква во домашни услови
Ако ви се јаде нешто поинакво, ароматично и исклучително вкусно со тиква, овој рецепт е совршениот избор. Чизкејкот од тиква спојува кадифена текстура со природната слатка нота на медот и ванилата, а за негова подготовка ви се потребни сосем малку напор и време.
In This Article:
Потребни состојки:
- 250 г крем-сирење - 180–200 г пире од тиква - 1 јајце - 1–2 лажици мед - 1 лажичка екстракт од ванила - 120–150 г путер-бисквити - 40–50 г растопен путер
Подготовка на тиквата и подлогата од бисквити
Најпрво подгответе ја тиквата. Испечете ја во рерна додека не омекне, а потоа изблендирајте ја додека не добиете мазно пире. Оставете го пирето целосно да се излади и внимавајте да не биде премногу водено, бидејќи вишокот течност може да влијае врз густината на кремот. За подлогата, сомелете ги бисквитите или издробете ги на ситни трошки, па измешајте ги со растопениот путер. Добиената смеса распоредете ја во мал калап за печење и добро притиснете ја на дното за да добиете цврста и рамномерна подлога.
Подготовка на кремот и печење на чизкејкот
Во посебен сад измешајте ги крем-сирењето, пирето од тиква, медот и екстрактот од ванила додека не добиете мазна, кремаста смеса. На крај додајте го јајцето и нежно промешајте додека не се соедини со останатите состојки. Истурете го кремот врз подлогата од бисквити и израмнете ја површината. Печете во претходно загреана рерна на 160 степени околу 40–50 минути. Важно е да не го препечете чизкејкот. Рабовите треба да бидат цврсти, а средината сè уште малку да се тресе при нежно поместување на калапот. Таа дополнително ќе се стегне додека колачот се лади.
Ладењето е клучно за совршена кремаста текстура
Откако ќе се испече, оставете го чизкејкот целосно да се излади на собна температура, а потоа ставете го во фрижидер најмалку четири часа, а најдобро преку ноќ. На овој начин вкусовите убаво ќе се соединат, а чизкејкот ќе добие нежна, кремаста текстура и богат есенски вкус.